Oleiros, 16 de febreiro de 2022-. Todas as persoas interesadas en participar no concurso de disfraces que organiza o Concello de Oleiros o venres 4 de marzo poderán tramitar a súa inscrición a partir de mañá. Poderá facerse a través da Sede electrónica ou presencialmente na Fábrica, ata o venres 4 de marzo ás 13:00 horas.
Tal e como se estipula nas bases, haberá dúas categorías, unha de grupos e outra de individuais-parellas. En grupos haberá un primeiro premio de 1.500 €, un segundo de 1.000 €, dous terceiros de 500 € e un accésit de 400 €. En individual e parellas o primeiro premio será de 400 €, o segundo de 300 €, haberá dous terceiros de 200 € e dous accésit de 100 €.
Ademais do concurso de disfraces, haberá baile e diversión coa orquestra Os Satélites. Antes, desde as 17:00 horas, haberá unha festa infantil para os máis pequenos coa actuación dun grupo de animación.