Oleiros, 17 de xaneiro de 2022-. O xornalista e veciño de Oleiros José Luis Gómez e a economista María Cadaval, autores de ‘Cómo salir de esta (II)’, presentan o libro este xoves ás 20:00 horas na Casa Charry. O acto tamén contará coa intervención do catedrático de economía da UDC e ex presidente da Xunta, Fernando González Laxe, e do alcalde, Ángel García Seoane.
‘Cómo salir de esta (II)’ é un título que require unha explicación de partida. A súa raíz é a mesma que a do libro onde o seu autor, José Luis Gómez, analizou en 2013 a saída da crise financeira de 2008, baixo o subtítulo: ‘España toca fondo. ¿Llega la reactivación?’. Así, pois, o xornalista que avanzara a crise española en 2007, sendo director da revista Capital, analizou nesa obra a saída da recesión.
Agora, este libro de Mundiediciones, o selo editorial do periódico Mundiario, con sede social en Oleiros, céntrase na segunda crise económica do século XXI, cunha dobre autoría, ao incorporar á profesora de economía María Cadaval, toda unha referencia na análise económica en varios medios de comunicación. Unha primeira conclusión de ‘Cómo salir de esta (II)’ é que a crise económica que trouxo a pandemia é máis intensa que a anterior pero que será menos duradeira.
Doutora en economía con mención europea, María Cadaval é profesora de Economía Aplicada da Universidade de Santiago de Compostela, onde tamén dirixe a Cátedra Iberoamericana. É subdirectora da Rede de Investigadores en Financiación Autonómica e Descentralización Financieira en España (RIFDE), e membro do Comité Asesor do Observatorio da Realidade Financiera (Orfin). Colabora en diversos medios de comunicación escritos e audiovisuais e é columnista de Mundiario.
José Luis Gómez, xornalista e fundador de Mundiario, periódico do que é editor, é tamén comentarista da Televisión de Galicia (TVG), Radio Galega e Radio Coruña (SER), así como analista económico dos diarios La Región e Atlántico, e editor do Anuario do Foro Económico de Galicia, entidade da que é membro fundador. Dirixiu a revista Capital e os xornais Xornal de Galicia e La Voz de Galicia e foi director editorial de Grupo Zeta. É autor, entre outros, do libro ‘Cómo salir de esta’, publicado en 2013.