Oleiros, 22 de maio de 2015-. O alcalde de Oleiros, Ángel García Seoane, denunciará ante os tribunais o diario La Voz de Galicia e o Partido Popular de Oleiros por un delito de inxurias e calumnias ante a publicación efectuada no día de hoxe, último da campaña electoral no que se titula “El PP de Oleiros acusa a Gelo de llamar «ramera política¿» a Moraleja”. O dito cualificativo nunca foi pronunciado por García Seoane no mitin celebrado na pista polideportiva de Meixonfrío, en Santa Cruz.
Hai máis de 500 testemuñas que estiveron presentes neste acto e que poden dar fe que en ningún momento deste a palabra «ramera», nin outra parecida, foi pronunciado pola boca de García Seoane. É de lamentar a campaña de desprestixio que se pretende levar a cabo por parte da oposición coa conivencia dalgúns medios de comunicación e na que se pretende resaltar a figura de Ángel García Seoane como unha persoa agresiva e irrespectuosa cos seus opositores.
Hai quen non tendo ningún argumento, nin proxecto para o municipio, unha vez máis, quere alcanzar o poder con mentiras difamacións e calumnias. No día de hoxe solicitarase á xunta electoral a rectificación do libelo aparecido no citado medio.