Oleiros, 4 de novembro de 2011-. O Concello de Oleiros, baixo o nome de Convivir coa Demencia, organiza ao longo deste mes de novembro varias actividades encamiñadas a coñecer máis a fondo esta enfermidade. A demencia é unha patoloxía que afecta a varias funcións cerebrais nun grao tal que altera a capacidade para desempeñar tarefas que con anterioridade realizaba autonomamente.
As actividades comezarán o próximo martes día 8 de novembro ás 18.30 horas nas Torres de Santa Cruz cunha mesa redonda que profundará no impacto familiar ante un diagnóstico de demencia. Ademais, do próximo 23 ao 30 de novembro celebrarase un obradoiro de formación para coidadores e coidadoras. As sesións comezarán ás 18.00 horas nas Torres de Santa Cruz.
O obxectivo deste programa é fomentar a comunicación entre os diferentes axentes que interveñen no contorno dunha persoa diagnosticada con demencia e reflexionar sobre o impacto que se produce no contorno familiar cando un dos seus membros recibe este diagnóstico. A participación de profesionais da saúde ofreceranos a oportunidade de coñecer mellor os procesos que interveñen na enfermidade, que debemos ter en conta á hora de coidar a persoa enferma.
Así mesmo, afondarase no coñecemento das necesidades do coidador ou coidadora para manter un bo estado de saúde física e emocional. As experiencias de familiares e as asociacións de familiares achegarán unha mirada reflexiva desde a convivencia coa persoa enferma. A través dos obradoiros impartidos por profesionais do servizo de axuda no fogar e centros de día, os coidadores e coidadoras poderán coñecer procedementos prácticos e técnicas que lles axuden a adquirir habilidades necesarias para realizar un mellor coidado.
O Concello de Oleiros vén desenvolvendo desde o ano 2009 un programa de apoio a coidadores e coidadoras co obxectivo de prestarlles apoio e axudarlles a coidar e coidarse mellor. Para conseguir este obxectivo o Goberno local traballa desde catro áreas de intervención: o estudo das necesidades dos coidadores e coidadoras, o proceso de descubrimento e coidado das emocións, a sensibilización e a formación e o apoio aos colectivos.