Oleiros, 5 de setembro de 2012-. Logo do parón de verán, o departamento de cultura retoma a súa programación cultural con música, teatro, maxia...
Os lugares que acollerán as distintas actividades son o Centro Cultural A Fábrica, de Perillo, o Centro Cultural As Torres, o auditorio Gabriel García Márquez e a Casa Charry.
De setembro a decembro a Casa Charry e o Centro Cultural A Fábrica seguirán acollendo exposicións de pintura, fotografía, escultura e outras manifestacións artísticas. Coas exposicións queremos seguir adiante no empeño de difundir a Cultura en todos os eidos e asemade incidir no desenvolvemento da educación artística dos nosos veciños e veciñas.
En outubro continúa o obradoiro de olería iniciado en xaneiro. As clases impartiranse no alfar situado no parque de “As Torres”, en Santa Cruz.
No mes de setembro retómase o obradoiro teatral. As clases serán de setembro a novembro. Horario: martes e mércores de 18 a 20 h. O lugar escollido é o Teatro As Torres de Santa Cruz. As prazas son limitadas e os destinatarios son os maiores de 18 anos.
A programación teatral iníciase este mes ata novembro. Abre a tempada a obra “A función do tequila”, de Manuel Guede Oliva baixo a dirección de Antonio Simón, Premio Rafael Dieste 2011, que se representará este sábado, 8 de setembro, ás 20:30 horas no auditorio "Gabriel García Márquez" de Mera.
A programación musical ábrese en outubro co Festival Albéniz, en novembro actuará Carmen Rey Grupo e en decembro Xoan Curiel.
O mes de decembro conta cunha programación especial onde terá cabida a maxia, o xa tradicional concerto de corais de Nadal, os monicreques e o teatro infantil para toda a familia.