Oleiros, 15 de marzo de 2022-. A Panadaría presenta o sábado ás 20:30 horas no Auditorio Gabriel García Márquez de Mera a comedia As que limpan. Areta Bolado, Noelia Castro e Ailén Kendelman forman o elenco desta obra creada polas tres actrices protagonistas e Paula Carballeira.
As que limpan son as invisibles que carretan ao lombo un sistema turístico precario. As que limpan fala da loita organizada das camareiras de piso dos hoteis por acadar uns dereitos laborais e sociais xustos. Fronte a elas, a avaricia voraz dos propietarios das cadeas hoteleiras. Hai quen nunca limpou un váter e hai quen limpa cincocentos ao mes.
As entradas poñeranse á venda a partir das 19:30 horas, a 3,50 euros, ata completar a capacidade permitida da sala. A obra está recomendada para un público adulto.