Hemeroteca

Asset Publisher

Back A próxima semana reinícianse as actividades do Plan de Igualdade

Oleiros, 6 de setembro de 2017-. Durante todo o ano, o Concello de Oleiros desenvolve distintas actividades no marco do Plan de Igualdade, accións que teñen como obxectivo o fortalecemento integral das mulleres a través do benestar físico e emocional. A próxima semana retómase a actividade no Obradoiro do Corpo e no Obradoiro Obxectivo Eu, para os que existen prazas dispoñibles.

O Obradoiro do Corpo é unha actividade física que persegue obxectivos de benestar integral, revalorizando a identidade de cada muller participante desde a propia actividade corporal, así como fomentar hábitos de vida saudábeis e favorecer unha maior vida social. As sesións comezan o mércores 13 de setembro na Casa da Cultura de Perillo.

O Obradoiro Obxectivo Eu céntrase na posta en escena das fortalezas de cada unha das persoas participantes, para seguir traballando nun maior autocoñecemento, sempre a través da creatividade audiovisual. Comeza o 15 de setembro e desenvólvese no Centro Municipal de Formación Isaac Díaz Pardo, en Os Regos. Esta actividade está aberta a homes e mulleres.

As persoas interesadas en participar nalgún destes obradoiros poden informarse no departamento de Servizos Sociais de Oleiros, a través do Facebook dos Servizos Sociais Oleiros, na web municipal ou ben a través do teléfono de atención ao veciño 981 610 000.
 

back link