Oleiros, 5 de novembro de 2021-. Este domingo 7 de novembro, en horario de 10.00 a 15.00 horas, celebrarase a XXXII edición da Feira do Mel baixo a cuberta da pista polideportiva de Perillo, na avenida da II República. Un total de 34 apicultores procedentes de diversos puntos de Galicia virán a Oleiros a expoñer e vender os seus produtos.
As persoas que se acheguen a esta feira poderán coñecer e adquirir todo tipo de alimentos e artigos relacionados co mel, desde os máis tradicionais ata os cosméticos.
“Animo a todos os cidadáns a que veñan este domingo a Perillo. Virán apicultores de todos os puntos de Galicia a vender o mel que cultivan, o mellor que se pode comprar. Un produto natural, marabilloso para o organismo, cunhas propiedades únicas”, dixo o alcalde Ángel García Seoane.