Oleiros, 11 de novembro de 2015-. O sábado ás 20:30 horas no Auditorio Gabriel García Márquez, de Mera a compañía Voadora presentará o seu espectáculo de teatro musical “Waltz”, baixo a dirección de Marta Pazos, e coa participación de Jose Díaz, Marta Pazos e Hugo Torres. As entradas poñeranse á venda a un prezo de 3,50 euros a partir das 19:30 horas, ata completar a capacidade da sala. A obra está dirixida a maiores de 12 anos.
“Waltz” é un conto que fala de amor e desamor, de namoramentos e rupturas, da vida compartida e da lembranza de amores perdidos. En “Waltz” a vida é un salón de baile onde imos cambiando de parella; hainas que che pisan os pés, outras agárrante forte pola cintura, a algunhas súanlle as mans e con outras bailarías por toda a eternidade…
O máis universal dos temas, o amor, sempre está moi presente nas producións da compañía Voadora. Pero nesta ocasión Voadora decide lanzarse de cabeza e traballar integramente sobre el, dedicándolle un espectáculo no que se disecan os sentimentos, as emocións e as sensacións extremas que leva consigo este tema universal.