Oleiros, 23 de outubro de 2019-. A compañía Talía Teatro presenta o sábado ás 20:30 horas no Auditorio Gabriel García Márquez de Mera o seu espectáculo Vida de cans. Toño Casais, Dani Trillo e Artur Trillo forman o elenco desta obra escrita e dirixida por Cándido Pazó.
Vida de cans é a historia de tres actores. Tres cans. Ou tres actores que fan de can sen deixar de ser actores. Sen deixar de ser cans. Están recluídos nun recinto que lles preparou o seu amo. Moi grande, moi cómodo, moi ameno, moi limpo..., pero recinto. Ben tratados, ben atendidos, ben alimentados, ben acariñados..., pero recluídos. Fóra do recinto está a liberdade. Cos seus desacougos, as súas incertezas, os seus problemas, os seus perigos..., pero liberdade. Cada un dos tres afronta o conflito segundo a súa personalidade e todo vai derivando cara a unha traxedia que nunca deixa de ser comedia.
As entradas poñeranse á venda a partir das 19:30 horas, ata completar a capacidade da sala. A obra está recomendada para maiores de 12 anos.