Oleiros, 15 de outubro de 2019-. A compañía Redrum Teatro presenta o sábado ás 20:30 horas no Auditorio Gabriel García Márquez de Mera o seu espectáculo Idiota. Machi Salgado e Susana Sampedro forman o elenco desta obra de Jordi Casanovas, que dirixe Alex Sampayo.
Jordi Casanovas tende con habilidade as súas redes dramáticas nun texto maxistral estreado en Barcelona en 2015 e que está percorrendo todo o mundo con grande éxito de crítica e público. Esta comedia está chea de minas en forma de dilemas morais e inquietantes descargas de presión psicolóxica, mergúllase nos mecanismos de manipulación, nos resortes da cobiza, o poder das grandes corporacións, a desinformación culpable, a capacidade da tolerancia ante o abuso de autoridade e as inconmensurables dimensións da estupidez humana, sempre ignorante da letra pequena das cláusulas que impón a vida.
As entradas poñeranse á venda a partir das 19:30 horas, ata completar a capacidade da sala. A obra está recomendada para maiores de 12 anos.