Oleiros, 12 de marzo de 2019-. O vindeiro venres día 15 de marzo, ás 18:30 horas, a Biblioteca Central Rialeda acollerá a charla Unha solución para o noso planeta as bacterias que comen plásticos. Dimas López, membro de UDCiencia d+i, será o relator principal desta xornada.
A Biblioteca Central Rialeda, dentro do programa Ler para saber, está a albergar charlas sobre temas científicos dirixidas a nenas e nenos maiores de 10 anos, adolescentes e público en xeral. O 22 de marzo será a quenda do biólogo Francisco Armesto coa conferencia Imos experimentar. O 26 de abril Francisco Franco del Amo traerá a Rialeda Mar de plásticos. A última das xornadas será o 10 de maio, Aves da Ría do Burgo, co fotógrafo Antonio Patiño.
Con estas actividades preténdese achegar a ciencia a todas as persoas, ampliar os coñecementos sobre temas científicos de importancia na vida diaria, fomentar o coñecemento específico dunha materia determinada, dinamizar os fondos bibliográficos sobre estes temas, atraer á biblioteca a un público interesado pola ciencia e, en definitiva, fomentar a lectura e a consulta de libros que traten estas temáticas. Programáronse charlas e obradoiros sobre aspectos diferentes para atraer a un público de gustos diversos e variados.