Solos naceu en A Coruña en 2007 da man de Juan Pedre (voz) e David Grela (guitarra), que marcaron os primeiros anos do grupo cunha proposta sólida e contundente dentro do panorama do rock español. Despois dunha etapa convulsa, a banda regresou á actividade con nova formación e novo traballo, sumando a Gonzalo Mosquera (baixo), Johnny Bello (guitarra e teclados), Alex Rey (batería) e a colaboración destacada do saxofonista Pablo Añón.
O seu último EP, La Tristeza Alternativa, con tres temas “rompedores e innovadores”, supuxo o regreso á escena dun grupo con certa bagaxe e ganas de explorar novos camiños, cun son que bebe do mellor rock estatal e que destaca por unha produción con moita personalidade. Nos concertos máis recentes, temas como De Farol (co que adoitan pechar os pases) son coreados polo público, que pouco a pouco vai descubrindo a unha banda que apostou sempre pola cercanía e a calidade sonora.