Oleiros, 27 de novembro de 2014-. Esta mañá abriuse o prazo para inscribirse na próxima edición de Ociolerios, o popular programa de actividades de lecer e tempo libre do Concello de Oleiros. O variado conxunto de obradoiros programados nesta edición persegue, ademais de entreter con esta oferta de ocio formativo, fomentar a convivencia entre os veciños e veciñas de distintos lugares do municipio. Para isto, e como vén sendo habitual, organizáronse tres grupos de idade: para os máis novos de 14 a 17 anos, para a mocidade de 18 a 35 anos e o grupo de Xoveoleiros, para os veciños de máis de 36 anos. O período de inscrición permanecerá aberto ata o próximo 15 de decembro. Despois do 17 ao 19 de decembro se levará a cabo a publicación de listas provisionais e reclamacións, o 22 farase o sorteo público e o día 30 de decembro publicaranse as listas definitivas e datas de pagamento.
Nesta nova edición de Ocioleiros consérvanse algúns das actividades con mellor acollida nas pasadas edicións, e introdúcense novas clases, como ioga, obradoiro de costura e iniciación ao hóckey a patíns, que intentarán acadar o mesmo éxito das xa consagradas neste programa no que participan máis dun millar de veciños e veciñas do municipio. Como gran novidade este ano, créase un novo grupo de actividades. Ademais dos tradicionais conxuntos de actividades para os grupos de idades, xurde unha cuarta listaxe de obradoiros comúns. Nela, inclúense un amplo abano de divertidas opcións como xardinería, repostería ou bailes de salón, onde os participantes compartirán experiencias con xente de todas as idades.