Oleiros, 18 de novembro de 2015-. O sábado 21 de novembro ás 20:30 horas no Auditorio Gabriel García Márquez de Mera, a compañía Teatro do Atlántico presentará o seu espectáculo “O principio de Arquímedes”, de Josep María Miró i Colomina, baixo a dirección de Xulio Lago, e que conta con María Barcala, Toni Salgado, Alberto Rolán e Marcos Vieitez no seu elenco. As entradas poñeranse á venda a partir das 19:30 horas a un prezo de 3,50 euros, ata completar a capacidade da sala.
A obra xira arredor da figura dun adestrador de natación con alumnos infantís, recae a sospeita, manifestada polos pais dos rapaces, de que puidera tratarse dun pederasta. A acusación, provocada por un feito con tantos argumentos para que sexa fundada como para que sexa absolutamente infundada, medra pouco a pouco e alimenta o medo, esa sombra negra que, ao que parece, xa se converteu en presenza inevitable na nosa sociedade.