Oleiros, 13 de novembro de 2015-. O Goberno local reunirase o vindeiro venres 20 de novembro cos representantes das distintas entidades veciñais, culturais, educativas e deportivas do municipio para presentarlles o documento que recompila a proposta do executivo local para os orzamentos do próximo exercicio. Esta reunión, que terá lugar na casa Charry ás 20:00, contará coa presenza do alcalde, Ángel García Seoane. Durante a sesión informarase de forma pormenorizada dos distintos capítulos do orzamento e farase especial fincapé nas partidas destinadas a financiar os servizos sociais, culturais, educativos e deportivos do municipio.
A convocatoria dos colectivos veciñais do municipio para a presentación dos orzamentos anuais realízase cada ano por parte do Goberno local de Alternativa dos Veciños. A través desta iniciativa o executivo local pretende elaborar uns orzamentos máis participativos. Con anterioridade a esta convocatoria, o Goberno local dirixirase por carta aos colectivos de maior entidade para solicitar as súas propostas de cara a confeccionar o documento que agora se presenta.
“Antes de levar os orzamentos ao pleno, queremos informar ás sociedades da situación na que se atopa a confección do orzamento. Explicarlles que peticións das que realizaron se inclúen nas contas e cales non”, comentou o alcalde Ángel García Seoane.