Oleiros, 08 de setembro de 2016-. Ante as demandas do Concello de Oleiros da necesidade de limpar as beiras dos ríos que transcorren polo municipio, Augas de Galicia realizará tarefas de limpeza no río da Loba, no río do Couto, no río do Seixo e no río de Bastiagueiro. Con estas actuacións preténdese evitar posibles asolagamentos ante episodios de chuvia moi intensos, como os do inverno pasado.
Moitas das beiras e das canles destes ríos atópanse cheos de ramas, con árbores caídas e todo tipo de maleza que poden chegar a orixinar problemas para a circulación da auga. Os traballos realizaranse na zona de servidume, que comprende 5 metros.