Se por algo se distingue o Concello de Oleiros é pola cantidade de servizos e infraestruturas públicas a disposición dos veciños e veciñas, entre os que destacan os 972.000 metros cadrados de zonas verdes. Nun mundo cada vez menos preocupado polo medio ambiente, podemos sentir un grande orgullo de ter unha identidade tan singular.
Todas as localidades de Oleiros contan cun importante patrimonio ambiental que enriquece o noso pobo e fai do municipio un entorno ideal para a convivencia. Nesta época de ruído, contaminación, tráfico, grandes cidades e deshumanización, a existencia de espazos verdes agradables e coidados supón un oasis entre o caos. É unha maneira de reconectarnos a unha natureza da que día a día pretenden afastarnos máis.
O patrimonio público de Oleiros acadouse grazas a unha xestión urbanística honesta e ao traballo de moitas persoas durante anos. Logramos numerosos servizos, equipamentos e espazos públicos a través de convenios, cesións obrigadas polo planeamento, compensacións, permutas e, en definitiva, a colaboración necesaria e solidaria entre a cidadanía e o Concello. Só en casos moi concretos, para protexer o territorio público de posibles especulacións e para conservar a nosa riqueza medio ambiental, procedeuse á aplicación do mecanismo constitucional da expropiación.
Pero unha situación urbanística como a de Oleiros non é froito do azar. O pormenorizado estudo dos casos, a aprobación dos tres plans xerais urbanísticos -1985, 1995 e 2009- e o desenvolvemento de diversos plans parciais, foron elementos clave para a preservación e o desenvolvemento sostible do noso territorio.
Hoxe as veciñas e veciños de Oleiros gozamos duns servizos e dunhas infraestruturas que nos sitúan á vangarda de España. Paseos marítimos, parques e xardíns, praias e centos de prazas públicas que dan nome a grandes protagonistas da historia da humanidade, así como outros pequenos espazos verdes espallados por todo o territorio municipal e que non aparecen nesta web, fan de Oleiros un paraíso no cal paga a pena perderse.
