O pleno municipal do Concello de Oleiros do mes de abril aprobou a moción presentada polo Goberno municipal para apoiar aos integrantes da ONG Proemaid que van ser xulgados en Grecia por realizar labores de rescate ás persoas refuxiadas que atravesan o mar Mediterráneo. Manuel Blanco, Julio Latorre e Enrique Rodríguez acudiron á illa grega de Lesbos para realizar actividades de rescate e salvamento e están acusados dun suposto delito de tráfico de persoas en grao de tentativa e de posesión de armas.
Proemaid é unha asociación española sen ánimo de lucro constituída por profesionais das emerxencias que prestan o seu traballo de forma voluntaria e altruísta. No seu proxecto en Lesbos, esta ONG ten rescatado desde decembro de 2015 a máis de 50.000 persoas do Mediterráneo, facendo unha labor humanitaria imprescindible.