En xaneiro de 2024 o pleno municipal aprobou reclamar á Xunta de Galicia a ampliación dos espazos destinados a centro médico no edificio da Casa do Mar, por estar infrautilizado. Nin PP nin PSOE votaron a favor naquel momento desa proposta. Agora, ano e medio despois, o PP anuncia que cambia de postura.
“Agora vén o Partido Popular dicindo que olé ao que dixo sempre o Concello de Oleiros. Que si, que temos razón, que hai que amplialo. Pois tarde piaches, pero... que o fagan, que iso é o que desexamos e polo que tanto levamos loitando”, comentou o alcalde Ángel García Seoane.
A raíz das continuas demandas do Concello, a Xunta de Galicia procedeu a realizar unha pequena reforma que si mellora a situación pero que resulta insuficientes para dotar o centro dos profesionais que realmente se necesitan. Tamén recentemente, despois das denuncias públicas do Concello, procedeuse a arranxar os graves danos estruturais do edificio, que chegaron a producir caída de cascotes sobre os accesos da instalación.