A Garda Civil e o Concello de Oleiros impartiron unha xornada de sensibilización e formación dirixida ao alumnado de 4º da ESO do IES Neira Vilas, coa que se buscou achegar unha visión ampla sobre a violencia de xénero, as súas diversas manifestacións e os recursos dispoñibles para a mocidade en situacións de vulnerabilidade.
Durante o encontro, a Garda Civil ofreceu unha charla na que explicou ao alumnado que é a violencia de xénero, como se manifesta en diferentes ámbitos e cal é a realidade dos datos sobre esta problemática. Ademais, desde os Servizos Sociais e Igualdade do Concello tamén se presentaron os recursos municipais dispoñibles para a adolescencia, facendo fincapé na importancia de contar con espazos de apoio e asesoramento.
A exposición dos Servizos Sociais puxo en valor que este servizo municipal non é exclusivo para persoas en situacións de extrema vulnerabilidade, que tamén, senón que está aberto a toda a cidadanía, incluída a mocidade. Destacouse a dispoñibilidade de profesionais que poden ofrecer apoio e acompañamento ante situacións difíciles no ámbito familiar, afectivo ou social, mais tamén ante situacións de malestar, dúbidas e problemáticas que adoitan darse nesas idades.
Tamén se lles presentou o SATICO, Servizo de Asistencia Técnica en Igualdade, como un espazo onde a mocidade pode acudir para resolver dúbidas sobre sexualidade, diversidade, racismo, discursos de odio, violencias machistas, LGTBIfobia e outras inquedanzas sociais. Reiterouse que desde este espazo non se xulga, ofrecendo un espazo de asesoramento, acompañamento ou de reflexión.
Tamén se tratou a existencia dos Puntos Violeta, espazos habilitados en eventos e centros educativos para ofrecer información e apoio ante situacións de violencia, e dos Puntos Arcoíris, orientados á prevención e loita contra a LGTBIfobia.
Desde o Concello de Oleiros destacouse a importancia de que a mocidade coñeza e teña acceso a estes servizos, facendo un chamamento á mocidade para que utilice estes recursos, sen medo nin prexuízos, reafirmando o compromiso municipal coa sensibilización e o apoio a quen o precise.
