Sexta teniente de alcalde y Concejala de Servizos Sociales e Igualdad
O Concello instalará Puntos Violeta nas festas para previr violencias sexuais, LGTBIfóbicas e machistas
O Concello de Oleiros, en colaboración coas comisións de festas do municipio, está a traballar activamente para a prevención das violencias sexuais, LGTBIfóbicas e demais violencias machistas durante as festas a desenvolver ao longo de todo o verán nas diferentes parroquias. Entre outras iniciativas, o Concello instalará Puntos Violeta nas celebracións nocturnas.
Os Puntos Violeta son puntos de atención a vítimas de agresión sexual, LGTBIfóbica e calquera outro tipo de agresión machista. Formado por unha equipo experto de profesionais na materia, tamén conta con acompañamento psicolóxico. Ademais, ofrecen información sobre os recursos municipais na materia e realizan accións de sensibilización dirixidas á cidadanía, coas que se busca dotar de ferramentas para a prevención, detección e actuación fronte ditas violencias. Terán un horario de atención de 23:00 da noite a 2:00 da madrugada.
Un ano máis, coa campaña “Non faltes á festa, pero de festa non faltes”, o Concello de Oleiros busca dotar a toda a cidadanía de ferramentas para a prevención, detección e actuación fronte a violencia de xénero e demais violencias machistas durante as celebracións, actos festivos e espazos de ocio nocturno. Para isto, a través das redes sociais e plataformas de comunicación coas que conta o Concello, proporcionarase durante todo o verán información encamiñada a prever ditas violencias, dar a coñecer os recursos e servizos municipais específicos neste eido, recoñecer as violencias sexuais e LGTBIfóbicas e saber que facer e como actuar se se é vítima ou testemuña dunha agresión etc. Pódese consultar todo o material de sensibilización na páxina web do Concello.
