Oleiros, 6 de outubro de 2015-. O auditorio do centro cultural A Fábrica acolle este venres ás 20:30 horas o concerto de Fado1111, incluído dentro da edición número XXVI do Festival Internacional de Música de Pulso e Púa “Cidade de Cristal” organizado pola Agrupación Albéniz. A entrada é libre, ata completar a capacidade da sala.
A agrupación Fado1111 de Guimarães, representa a mestura do Fado de Lisboa e a Canção de Coimbra. Inspírase na tradición oral, que di ser 1.111 o ano do nacemento de Don Alfonso Henriques (1º rei de Portugal) e Guimarães o berce da súa “Portugalidade". Trátase dun proxecto, con matiz e espazo físico na cidade de Guimarães, que promove espectáculos nas dúas vertentes posibles do Fado (Coimbra e Lisboa).