Desde hai dezaoito anos o Concello de Oleiros vén organizando a festa do Entroido para os nosos maiores, á que asisten todos e todas os veciños e veciñas, co fin de manter e gozar desta festa tan enraizada na nosa cultura e tradición. Este ano a "Festa do Entroido" terá lugar o próximo venres 24 de febreiro e trasladase ao pavillón Arsenio Iglesias da localidade de Santa Cruz. A pesar do cambio de ubicación o programa da festa seguirá a ser o mesmo que outros anos, adicada a todas as persoas que desexen festexar o Entroido e cunha mirada especial aos nosos maiores. Comezará ás 18:00 h e ten previsto rematar contra as 22:15 h. Ao longo da tarde haberá diversas actividades entre as que se atopan a actuación da orquestra Os Satélites, o concurso de disfraces, con importantes premios, e unha merenda con chocolate quente e churros para as persoas maiores. Tampoco faltará a "actuación sorpresa" que cada ano agardan os veciños e veciñas de Oleiros e protagoniza o alcalde Angel García Seoane. Haberá tamén un servizo de autobuses gratuíto que percorrerá todas as localidades desde as 17:45 h para trasladar as persoas que o desexen ata a polideportiva de Santa Cruz.

Para festexar o Entroido a Concellería de Servizos Sociais organiza un ano máis o "Concurso de disfraces" Neste concurso que se celebrará o próximo venres 24 de Febreiro na polideportiva municipal Arsenio Iglesias de Sta Cruz, poderán participar todas as persoas maiores de 16 anos que o desexen. Os disfraces poderán concursar en dúas categorías, grupos o individual. Valorarase a creatividade, posta en escena, orixinalidade, calidade na confección e as características dos materiais utilizados, ademais valorarase aqueles disfraces onde o conxunto de todos estes elementos sexa representativo do espírito festeiro do Entroido.

Dentro das actividades do Programa de "Envellecemento activo" da Concellería de Servizos Sociais, as persoas maiores do Concello de Oleiros participarán no "Plan Mayor Seguridad" do Ministerio do Interior. O dito plan consiste nunha serie de charlas informativas, impartidas por especialistas da materia da Guardia Civil, para que os nosos maiores adopten medidas de protección na vida diaria que reforcen a súa seguridade.

Actividade multicultural dirixida a promover valores como o respeto, a solidariedade e a equidade de xénero. Data: 1 de decembro Hora: 18:00 h Lugar: Centro Municipal de Formación Isaac Díaz Pardo, urbanización Dos Regos Dirixida a: nenos e nenas de 5 a 8 anos residentes no Concello de Oleiros. Límite de participantes: 40 prazas É imprescindible para poder participar que se inscriban previamente no Departamento de Servizos Sociais do Concello de Oleiros, en persoa ou ben a través do teléfono 981 610 000, extensión 3118.

O Concello de Oleiros, baixo o nome de "Convivir coa Demencia", programa para os días 23 e 30 de novembro dúas actividades encamiñadas a coñecer máis a fondo esta enfermidade. A demencia é unha patoloxía que afecta a varias funcións cerebrais en un grado tal que altera a capacidade para desempeñar tarefas que con anterioridade realizaba autonomamente (recordar, orientarse, conversar, manexo dos cartos, vestirse, camiñar...) e que ten un forte impacto nas familias. Por iso, o traballo cos familiares que conviven coas persoas con demencia é tanto ou mais importante que o que se presta directamente ao enfermo.