Concello de Oleiros

Concello de Oleiros

Normalización  
Portada » O Concello » Concellería de Cultura e Normalización Lingüística » Normalización
   

NOVAS

     

Letras Galegas 2017: PROXECCIÓN DO DOCUMENTAL CONTANDO A CARLOS CASARES. Mércores 31 de maio ás 20.30 horas na Fábrica

Contando a Carlos Casares é un documental no que participan familiares e amigos, así como especialistas sobre o autor homenaxeado, cos cales percorremos as facetas máis interesantes da súa vida para poder coñecer o home, así como poder atopar as chaves coas que enfrontarnos á súa obra literaria. Despois de ver o documental haberá unha charla-coloquio onde se poderán poñer en común as nosas inquedanzas e observacións sobre o escritos ourensán. Entrada libre ata completar a capacidade da sala. Apto para todos os públicos.

Letras Galegas 2017: A galiña azul de Carlos Casares chega ás escolas públicas de Oleiros

As historias da formiga esquiadora, a galiña azul do Lorenzo e os inventos do Leoncio chegan a todos/as nenos/as de 6º de infantil dos colexios públicos de Oleiros. Co obxectivo de celebrar as Letras Galegas 2017, a Concellería de Cultura e Normalización Lingüística achega aos máis pequechos/as do concello un dos clásicos da literatura infantil galega escrito por Carlos Casares. Os nenos e as nenas gozarán nos próximos días dunha contada lúdica e participativa do 1º libro de literatura infantil escrito polo ourensán homenaxeado e dun obradoiro de ilustración con tampóns e tinta.

O Cancodrilo chega ás escolas de Oleiros

Co gallo das Letras Galegas, o Concello de Oleiros desde a Concellería de Cultura e Normalización Lingüística agasalla ás escolas infantís e aulas de infantil dos colexios públicos con exemplares do Cancodrilo en Oleiros, escrito por Xabier López Mateos e ilustrado por Javier Rey Feijoo e Silvia González Sánchez. Cancodrilo, o protagonista animal destes contos, metade can e metade crocodilo, chega ao noso municipio en compañía dos seus amigos para coñecer os lugares emblemáticos de Oleiros. Xunto a Ourizopicón, Laura, Adela e Nico visitan a Casa do Charry, As Torres, o Castelo de Santa Cruz, a lagoa e o faro de Mera, os cantís e o Castro de Punta Torrella, o porto de Dexo, as bateas de Lorbé, a biblioteca Rialeda e o Centro Cultural A Fábrica. Nas súas aventuras, Cancodrilo e os seus amigos deberán enfrontarse a situacións cotiás da vida das que tratará de aprender algo novo e nas que se demostrará o valor da amizade e o respecto polos demais e pola contorna que nos rodea. Ademais disto, este volume achegará a xeografía oleirense aos máis pequechos e pequechas da casa nun formato atractivo, lúdico e cargado de cor.

Máis de 450 alumnas e alumnos de 1º e 2º de primaria dos colexios públicos do Concello gozaron este xoves do Concerto de Gramola Gominola no Auditorio de Mera.

A Gramola Gominola chegou ao Auditorio de Mera para facer as delicias de todas as crianzas de 1º e 2º de primaria. Co gallo da celebración das Letras Galegas, a Concellería de Cultura e Normalización Lingüística agasalla o alumnado cun concerto de música infantil integramente en galego. Deste xeito desde a propia concellería e desde o SNL municipal preténdese promover a lingua galega a través da música, fomentar o uso da lingua entre os nenos e as nenas e amosar que a lingua rosaliana ten cabida en todos os ámbitos: música, teatro, lecer...

Letras Galegas 2017: O venres presentouse en Radio Oleiros o caderno didáctico dedicado a Carlos Casares

O caderno elaborado polo profesorado do IES María Casares, coordinado por Pepe Taboada e ilustrado por Miguel Cuba presentouse en Radio Oleiros. O comité de redacción desta fermosa publicación; Raquel Guimarei, Pepe Taboada e Fernando Díaz-Castroverde e o ilustrador Miguel Cuba explicaron en directo as características do caderno, os obxectivos que se perseguen co mesmo e alentaron ao público adolescente e escolar a participar con entusiasmo das Letras. O Concello de Oleiros desde a Concellería de Cultura e Normalización Lingüística está a repartir nos institutos e colexios públicos do municipio os exemplares do caderno didáctico, que chegarán tamén nos vindeiros días ás bibliotecas municipais e ás entidades socioculturais do concello. Deste xeito preténdese dar a coñecer a figura e a obra do escritor ourensán e impulsar a lingua galega como lingua de cultura.

Entidades financiadoras
Goberno de España Comunidade Económica Europea Plan Avanza