Health Work Committees (HWC), a organización sanitaria na que traballa Juana, realizou decenas de proxectos sanitarios e sociais. Son actividades como levar a prevención sanitaria ás aldeas de Cisxordania, vacinar as crianzas de Xerusalén Este, levar a saúde prenatal e natal ás mulleres de Cisxordania, realizar campañas de información e formación en innumerables cuestións relacionadas coa saúde, cos hábitos sanitarios ou coa prevención das enfermidades máis comúns na zona, atender gratuitamente ao 40% dos seus pacientes nas 14 clínicas que ten a HWC polo territorio baixo a Autoridade Palestina e outras actividades polo estilo que, dificilmente, poden considerarse sospeitosas de constituír ningunha clase de delito. 

 

A pesar do seu carácter humanitario e sanitario, ou quizais precisamente por iso, a HWC está a ser atacada intermitentemente polo Estado de Israel nunha política de represión, desgaste e desmantelamento das organizacións da sociedade civil palestina. É imposible que os proxectos de cooperación financiados en España poidan ter ningún viso delituoso xa que a cooperación española, maioritariamente pública, obriga á realización das actividades previstas e á xustificación completa do financiamento dos diferentes proxectos que se levaron a cabo co noso apoio.

 

Ante a detención de Juana Ruiz, o alcalde e todas as persoas que forman o Goberno municipal asinaron o pasado mes de abril un manifesto para transmitir á opinión pública e ás institucións a grande preocupación pola situación na que se atopaba esta cooperante española.